ممبئی، 3/اکتوبر (ایس او نیوز /ایجنسی) مہاراشٹر میں اسمبلی انتخابات کی تاریخوں کا اعلان کسی بھی وقت متوقع ہے، اور اسی دوران ’گھڑی‘ انتخابی نشان کو لے کر ایک بار پھر تنازعہ سپریم کورٹ تک پہنچ گیا ہے۔ این سی پی-ایس پی (شرد پوار گروپ) اور این سی پی (اجیت پوار گروپ) دونوں ہی اس نشان پر اپنی دعویداری جتانا چاہتے ہیں۔ پچھلے لوک سبھا انتخابات میں شرد پوار کے گروپ کو ایک نیا انتخابی نشان ملنے کے بعد میدان میں اترنا پڑا تھا جبکہ اجیت پوار گروپ نے ’گھڑی‘ کا نشان استعمال کیا تھا۔ اب ایک بار پھر اس نشان کو لے کر عدالت میں قانونی جنگ چھڑ چکی ہے۔

دراصل شرد پوار نے ایک بار پھر سپریم کورٹ کا رخ کیا ہے۔ انھوں نے عدالت میں نئی عرضی داخل کی ہے جس میں آئندہ مہاراشٹر اسمبلی انتخاب میں اجیت پوار کو ’گھڑی‘ نشان کا استعمال کرنے سے روکنے کا مطالبہ کیا گیا ہے۔ سپریم کورٹ اس عرضی پر 15 اکتوبر کو سماعت کرنے کے لیے راضی بھی ہو گیا ہے۔ شرد پوار کا مطالبہ ہے کہ جب تک سپریم کورٹ الیکشن کمیشن کے حکم کے خلاف داخل اپیل پر فیصلہ نہیں سنا دیتا، تب تک ’گھڑی‘ کا استعمال روک دیا جائے۔ انھوں نے گزارش کی ہے کہ سپریم کورٹ اجیت پوار کو اسمبلی انتخاب کے لیے نئے انتخابی نشان کی عرضی داخل کرنے کہے۔

دوسری طرف این سی پی (ایس پی) نے بدھ کے روز ریاستی حکومت کے خلاف ایک فرد جرم پیش کر دیا ہے۔ اس میں ریاست سے صنعتوں کی نقل مکانی اور نظامِ قانون کے تباہ ہونے کا دعویٰ کیا گیا ہے۔ جینت پاٹل کا اس تعلق سے کہنا ہے کہ ہم ریاست میں ’حق مانگ رہا مہاراشٹر‘ مہم شروع کر رہے ہیں۔ مہاراشٹر حکومت کے خلاف فرد جرم تیار کرنے کے لیے ہم متحد ہیں۔ پاٹل کا یہ بھی کہنا ہے کہ گزشتہ 10 سالوں میں بی جے پی اور اس کی ساتھی پارٹیوں نے چھترپتی شیواجی مہاراج، جیوتبا شاہو، جیوتبا پھولے اور بی آر امبیڈکر کے نظریات کو کمزور کیا ہے۔ کسان بھی پریشان ہیں، ان کے مسائل کی طرف کوئی توجہ نہیں دی جا رہی۔